Varjazzjonijiet tas-Skiet

L-ebda skiet mhu bħal ieħor. Hemm is-skiet ta’ kmieni filgħodu u dak ta’ tard billejl. Hemm skiet artab u komdu li jqarreb u jwaħħad, li jisboq bi sbuħitu kull tentattiv ta’ kliem. Hemm skiet kennieni li jagħmlilna tajjeb nitgeżwru fih meta kollox madwarna jsir wisq. Kultant, imma, is-skiet jaf ikun oħxon ċpar, ħarba, fdal jew baħħ. Jaf jistona, idarrab, iħalli f’ħalqna togħma ta’ mrar. Kultant inkunu aħna li neħtieġu s-skiet, drabi oħra jinfirex fina bla ma nfittxuh, xi minndaqqiet jiġi impost fuqna u sta għalina naraw x’naqbdu nagħmlu bih.

F’din il-ġabra ta’ poeżiji, Nadia Mifsud tirrakkonta skitijiet differenti, mis-skiet l-iktar intimu sa dak li saħansitra jista’ jissejjaħ esperjenza kollettiva, bħal meta d-dinja nħafnet mill-pandemija u ma konniex nafu x’naqbdu ngħidu (iktar).

U int, qatt doqt is-skiet? Qatt żfintu? Taf tgħid x’kulur(i) għandu?

Varjazzjonijiet tas-Skiet huwa ktieb magħmul bl-idejn minn Kotba Calleja. Din il-pubblikazzjoni ġiet megħjuna mill-Fond Nazzjonali tal-Ktieb (Kunsill Nazzjonali tal-Ktieb).

  • Book specifications
  • Title: Varjazzjonijiet tas-Skiet
  • Author: Nadia Mifsud
  • Publisher: Ede Books, Malta, 2021
  • Cover: Hardback, half binding in natural paper
  • Language: Maltese
  • Format: 225mm x 140mm
  • Pages: 86 pages
  • Binding: Hand sewn and glued, exposed sewing on spine
  • ISBN: 978-99957-45-29-5
  • Designed, printed and bound in Malta
  • Limited edition of books includes ‘qtar’ tote bag

20.00